Bloggfærslur mánaðarins, maí 2008

Í dag eru þrjú ár síðan Huginn fékk nýja lifur.

17. maí 2005 gekkst Huginn undir lifrarígræðslu á Barnaspítalanum í Pittsburgh, þá tæplega 6 mánaðar gamall. Á sama tíma gekkst Fjóla undir mikla aðgerð á Montefiore-spítalanum. Var hluti af lifur hennar tekinn og græddur í Hugin. Þessum degi mun ég aldrei gleyma, þó að þessi dagur hafi verið í hálfgerðri móðu hjá mér.

Ég vaknaði þennan dag um klukkan 4 eftir tveggja tíma svefn. Ég fór upp á spítala til Fjólu og hitti hana þar sem það var verið að búa hana undir aðgerðina, Sævar bróðir og Lovísa konan hans voru á Barnaspítalanum hjá Hugin, en hann var þarna orðinn mjög veikur vegna lifrarsjúkdómsins og ljóst var að hann ætti aðeins örfáa daga eftir ef hann fengi ekki nýja lifur.

Eftir að Fjóla fór í aðgerðina um klukkan korter í sjö og þá hljóp ég yfir á Barnaspítalann til að hitta Hugin, ég var hjá honum þar til hann fór í aðgerðina um klukkan hálf tíu. Ástæðan fyrir þessum tímamun á aðgerðunum var sá að best væri að lifrarbúturinn úr Fjólu væri kominn á Barnaspítalann um leið og ónýtan lifrin væri tekin úr Hugin. Klukkan var orðinn sex um kvöld þegar ég loksins hitti Fjólu aftur og klukkan var orðin 10 þegar ég fékk hitta Hugin.

Ég held að fáir geta gert sér grein fyrir hvað gekk á þennan dag hjá mér. Ég var nánast ósofinn þegar dagurinn hófst og þegar bæði Huginn og Fjóla voru í aðgerð þá ákvað ég að fara heim að leggja mig aðeins, ég náði að leggjast í svona 15 mínútur (án þess að sofna) og þá gat ég ekki lengur verið heima og fór aftur á spítalann. Það var mikill léttir að hitta Fjólu aftur og eftir að hún fór að sofa aftur skokkaði ég yfir á Barnaspítalann og þar tók við bið og aftur bið. Bið var það sem einkenndi þennan dag hjá mér.

Það var eitt atvik sem gerðist á Barnaspítalanum um kvöldið sem segir ýmislegt um hvernig það er að eiga bæði barn og unnustu í mikilli aðgerð, maður reynir að halda sönsum og andlitinu en það þarf lítið til að missa tökin á sjálfum sér. Þannig var að ég, Sævar og Lovísa vorum að bíða á Barnaspítalanum, við höfðum fengið litlar fréttir af aðgerðinni á Hugin nema það að allt gengi vel. Síðan kemur að því að við erum kölluð á fund með dr. Rakish Sindhi sem stjórnaði aðgerðinni á Hugin og hann sagði okkur hvernig allt hafi gengið fyrir sig og hvað við ættum von á á næstum dögum. þetta var góður fundur þar sem ég fékk að vita af öllum hættunum sem fylgja lifrarígræðslum (af hverju ætli ég hafi ekki fengið að vita af þessu fyrir aðgerðina?). Síðan tók við bið aftur þar til við myndum fá að hitta Hugin og sú bið var ansi löng fannst mér.

Síðan kom loksins að því að við vorum sótt á biðstofuna og okkur tilkynnt að núna fengum við að hitta Hugin. Þegar við komum að Gjörgæsludeildinni þá er mér vísað frá og ekki hleypt inn á deildina. Ástæðan var sú að ég hafði ekki aðgangsheimild. Ég var mjög ósáttur og reifst við móttökukonuna sem hleypir fólki inn á deildina. Ég neitaði að sækja um heimildina og bað hana vinsamlega um að tala við dr. Sindhi  og spyrja hann hvort ég mætti hitta Hugin og hún neitaði því. Ég sagði henni þá að ég ætlaði að hitta Hugin og hún myndi ekki koma í veg fyrir það, þá hótaði hún því að kalla til lögregluna og láta handtaka mig. Þarna var ég saklaus Íslendingur að bíða eftir að hitta barnið mitt eftir langa og mikla aðgerð og viðmótið sem ég fæ er hótun um handtöku og eftir að hafa séð handtökuna á Rodney King þá stóð mér ekki á sama. Ég gaf eftir og fór í móttökuna á fyrstu hæð og fékk aðgangsheimildina. Þess má geta að aðgangsheimildin sem Sævar og Lovísa höfðu voru fyrir 16. maí og hún var löngu útrunnin og það kom þessari blessaðri konu ekkert við. Það særði mig einna mest var það að á meðan ég var að ná í aðgangsheimildina þá fór þessi blessaða móttökukona yfir gjörgæsludeildar-reglurnar með Sævari og Lovísu, en ekki með mér.

Þegar ég kom til baka með heimsóknarheimildina, þá fengum við loksins að hitta Hugin og hann var bara flottur. Eftir þetta þá horfði þessa blessaða kona á mig alltaf með einhverju sérstöku augnráði, eina skiptið sem ég sá hana verulega hissa var þegar ég kom með Fjólu að hitta Hugin í fyrsta sinn. Ég hef grun um að hún hefði haldið að konan mín myndi líta öðruvísi út. Ég svona stór og mikill og síðan Fjólan svona lítil og nett.

Ég ætla að lokum að setja inn myndband af Hugin sem ég tók af Hugin daginn eftir aðgerðina, ég þurfti oft að hlaupa á milli spítala til að taka myndir af Hugin þar sem hann lá á Gjörgæslu til að sýna Fjólu þar sem hún lá á Gjörgæslu á allt öðrum spítala, þetta myndband er eitt af þeim. Spurning er hvernig getur nokkur maður staðist þessi augu?


Enn eitt fótboltabloggið,

fótboltakarlÞetta er samt ekki alveg fótboltablogg, heldur frekar blogg um síðustu daga og þar hefur mikið snúist um fótbolta þar sem enska deildin er að ljúka og sú íslenska að byrja.

Um síðustu helgi lögðum við lönd undir fót og fórum á bernskuslóðir Fjólu og nutum gestrisni foreldra hennar. Við gátum ekki lagt af stað fyrr en eftir hádegi á laugardeginum þar sem ég var að vinna um morguninn og síðan þurfti ég að koma við í Ölver og horfa á mína menn í Crystal Palace spila í úrslitakeppni um laust sæti í ensku úrvalsdeildinni. Leikurinn fór ekki eins og ég hafði vonast til og eftir leikinn brunuðum við norður. Helgin var stórfín, var mikið slappað af og rúntað um nágrennið. Ég lenti meira að segja í að aðstoða við sortera fylfullu merarnar frá hinum. Var þetta ný reynsla fyrir mig þar sem að það eina sem ég vissi um hesta þegar ég kynntist Fjólu var að hestabörnin hétu folöld og hægt væri að kaupa hesta í kjötborðum í stórmörkuðum.

Ég eyddi reyndar stórum hluta helgarinnar í símanum, þar sem við ákváðum að fá okkur öryggiskerfi í húsið okkar í síðustu viku og stóra prófraunin var um helgina og það má segja að kerfið hafi kolfallið á prófinu. Þar sem öryggiskerfið fór látlaust í gang og voru það kisurnar sem settu það í gang hvað eftir annað. Þannig að ég þurfti hvað eftir annað að tala við öryggisverðina um lausnir. Í vikunni kom síðan tæknistjóri og lagfærði kerfið þannig að lítil hætta er á kerfið fari í ganga þó kisurnar klóri sér á bak við eyrun.

Ég og HuginnÍ þessari norðurferð fékk ég mynd af okkur Hugin saman, þetta er sennilega síðasta myndin sem er tekin af okkur saman, en hún var tekin í fermingarveislu 4 dögum áður en Huginn Heiðar dó. Ég var ekkert smá ánægður að fá svona flotta mynd af okkur saman, þó myndin sé ekki alveg í fókus þá finnst mér hún frábær og læt hana fylgja þessari færslu.


Keflavík á metið.

Sumarið 2002 spiluðu ansi margir örvfættir leikmenn með Keflavík, til dæmis í leiknum gegn ÍBV voru 7 örvfættir leikmenn í byrjunarliði Keflavíkur. Þeir Jóhann, Haraldur, Kristján, Ómar, Adolf, Ólafur og Hjörtur eru allir örvfættir. Guðmundur Steinarsson kom svo inn á á 80 mínútu og voru þá 8 örvfættir keflvíkingar inn á í einu.


mbl.is Fimm örvfættir í byrjunarliði FH
Tilkynna um óviðeigandi tengingu við frétt

Stutt myndband fyrir helgina.

Ég set inn hérna lítið brot úr einni af mínum uppáhaldsmyndum, My Cousin Vinny. Þessi mynd er algjör snilld og sópaði að sér verðlaun á sínum tíma. Til dæmis fékk Marisa Tomei Óskarsverðlaun fyrir leik í þessari mynd.

Þetta atriði sem ég setti inn er eitt af betri atriðum myndarinnar. Þar segir frá þegar Vinny kemur til að hitta aðalsögupersónurnar en það er búið að handtaka þá fyrir morð. Þarna er lögfræðingurinn sem sagt að hitta skjólstæðing sinn í fyrsta sinn. Einhver misskilningur er á kreiki og heldur skjólstæðingurinn að hann sé að fá heimsókn frá öðrum fanga sem er kominn til að nauðga honum.


Afmælisbarn dagsins: -Kevin Peter Hall.

Þá er aftur komið að hinum geysivinsæla lið mínum um afmælisbarn dagsins. Afmælisbarn dagsins er Kevin Peter Hall, en hann fæddist í Pittsburgh í Pennsylvaniu þann 9. maí 1955 og hefði því orðið 53 ára ef hann hefði lifað.

Kevin Peter HallKevin ólst upp í Pittsburgh og vakti fyrst verulega athygli þegar hann fór að spila körfubolta með Penn Hills High School og á lokaári sínu í high school var hann orðinn 210 sentimetrar og skoraði 18 stig að meðaltali í leik og tók 10 fráköst. Eftir skólaskylduna gat hann valið á milli háskóla og valdi George Washington háskólann í Washington og lék hann með körfuboltaliði skólans á meðan hann kláraði námið.

Kevin stundaði leiklist í háskólanum líka og kynntist þar Jay Fenichel og stunduðu þeir báðir leiklistina af fullum krafti og eftir að þeir luku námi flutti Jay til Los Angeles til að reyna að koma sér áfram í leiklistinni, en Kevin flutti til Venesúla þar sem hann gerðist atvinnumaður í körfubolta, en þá var hann orðinn 220 sentimetrar á hæð. Kevin entist ekki lengi í atvinnumennskuna og eftir eitt ár ákvað að hann leggja leiklistina fyrir sig og flutti til Jay í Los Angeles.

PredatorKevin fékk nokkur lítil hlutverk í sjónvarpsþáttum og bíómyndum, en hann sló í gegn í kvikmyndinni Predator árið 1987, en þar fór hann með hlutverk Predator. Í kjölfarið fékk Kevin fleiri hlutverk og þegar hann lék gestahlutverk í sápuóperunni 227 kynntist hann einni aðalleikkonunni, Alaina Reed sem er sennilega þekktust fyrir að leika Olivia í Sesame Street á árunum 1969-1988 eða í 19 ár. Kevin og Alaina giftu sig í desember 1988.

Árið 1990 lenti Kevin í mjög alvarlegu bílslysi og þurfti að gangast undir skurðaðgerðir, í einni þeirra gerðist annað slys þegar Kevin var gefið blóð sem var sýkt af HIV-veirunni. Þann 10. apríl 1991 lést Kevin af völdum lungnabólgu sem má rekja til HIV-smitsins, tæplega 36 ára gamall. Lét hann eftir sig eiginkonu og tvö ung börn.

Þrátt fyrir að hafa leikið í þó nokkrum bíómyndum, þá sást sjalda andlitið á Kevin. Það sem flest hlutverkin sem hann fékk voru hlutverk skrímslis eða ómannlegrar veru. Þó sást hann til dæmis í lokaatriði Predator þar sem hann fer með hlutverk þyrluflugmanns.

Þegar ég bjó í Pittsburgh kynntist ég aðeins sögu Kevins, hann var dæmi um fátækans strák sem hefur körfuboltahæfileika og notar þá til að koma sér áfram í lífinu. Hann lifði alltaf heilbrigðu lífi og var fyrirmynd í öllu sem hann tók sér fyrir hendur. Af einhverjum óskiljanlegum ástæðum varð það lokahlutverk hans í lífinu að fá alnæmi og deyja af völdum þess aðeins nokkrum mánuðum síðar. Það þótti lýsa Kevin vel að strax eftir að greindist með HIV tilkynnti hann það opinberlega og fór aldrei í felur með sjúkdóminn eins og margir gera, fyrir það er hans minnst sem mikils baráttumanns í að uppfræða almenning um HIV og alnæmi.


Ekki fótboltablogg.

Já, þetta er ekki fótboltablogg. Eftir tvö fótboltablogg í röð er komið að fótboltalausubloggi. Gerið ég það áður en ég fæ kvartanir frá diggum lesendum. Æji, núna er þetta orðið að fótboltabloggi!

Í gær fór ég og mín heitt elskaða á fund á Gjörgæsludeildinni og var fundað um nóttina sem Huginn Heiðar dó, var þetta mjög góður fundur og vona ég að starfsfólkið þar geri sér grein fyrir hversu ánægð við erum með störf þess í gegnum tíðina og sérstaklega nóttina sem Huginn dó. Ég bloggaði um gærdaginn á heimasíðu Hugins.

Annars gengur lífið sinn vanagang. Ég mætti í vinnu nokkrum dögum eftir útförina, taldi best að henda mér út í djúpu laugina og takast á við lífið. Mér líður reyndar vel í vinnunni, en ég vinn hjá Fríhöfninni í Keflavík. Mér líkar vel við vinnuna, hef góða vinnufélaga sem eru stundum kannski full stríðnir, en ég get nú líka verið það. Síðan get ég komið með heila færslu um vinnuveitanda minn. Ég hef þurft að ganga í gegnum ýmislegt síðan Huginn fæddist og alltaf stóðu þeir vel á bak við mig í veikindum Hugins. Þegar ég fór til Bandaríkjanna með Hugin, þá fékk ég rausnarlegan styrk frá þeim. Síðan beið vinnan eftir mér þegar að ég kom heim. Ég var frá vinnu í eitt og hálft ár og mætti síðan eins og ekkert hafði í skorist.

Núna er um tvö ár síðan ég byrjaði að vinna aftur og eins og allir vita þá hefur hinn vinnandi maður ekki mikinn veikindarétt þegar kemur að veikindum barns, ég get lofað ykkur því að ég tók töluvert fleiri veikindadaga en ég átti rétt á og fékk þá greidda án nokkurs vandamáls. Það sama gerðist þegar Huginn dó, ég fékk frí þegjandi og hljóðalaust með þeim orðum að ég ætti að mæta í vinnu þegar ég yrði tilbúinn til þess. Ekki nóg með það, heldur fékk ég rausnarlega útfararstyrk frá vinnuveitandanum.

Það er oft talað um þegar maður vinnur hjá stóru fyrirtæki, að þá hættir fyrirtækið að hugsa um mannlegu hliðina, því hef ég ekki kynnst hjá mínum vinnuveitendum.


Stoke er djók.

palaceÉg er sáttur við mína menn, þeir burstuðu villimennina í Burnley 5-0 og gulltryggðu sæti sitt í umspilinu og þar mun Palace mæta Bristol City.

West Brom var algjört yfirburðalið í fyrstu deildinni og komst verðskuldað upp í úrvalsdeildina. Því miður get ég ekki sagt það sama um Stoke, þeir hafa ekki sýnt neitt í þeim leikjum sem ég hef séð með þeim í vetur og þeir eru nokkrir. Leikkerfi Stoke byggist upp á hinum gamla og sígilda leikkerfi Kick&Run. Þar sem þeir eru með öfluga varnarmenn sem geta sparkað fast og langt og eru síðan með sterka sóknarmenn sem geta hlaupið hratt. Þetta kerfi gekk upp hjá þeim í vetur (því miður). En Guð minn góður ef Stoke mun ekki styrkja sig verulega, þá munu þeir fara aftur niður með stæl næsta vor. Ég er að segja Stoke liðið er mun slakara lið en Derby var í fyrra.

Þessir sóknarmenn Stoke munu ekki eiga neitt erindi í Úrvalsdeildina og þetta Kick&Run kerfi mun aldrei ganga upp gegn sterkum liðum. Ég óska stuðningsmönnum Stoke til hamingju með úrvalsdeildarsætið, en Tony Pulis þarf að vera duglegur að kaupa leikmenn í sumar ef hann ætlar ekki að enda næsta tímabil með 11 stig eða minna. Eins og liðið er í dag, þá er Stoke djók.


mbl.is WBA og Stoke City í úrvalsdeildina
Tilkynna um óviðeigandi tengingu við frétt

Stóri leikurinn er á morgun.

palaceÁ morgun klukkan eitt hefst leikur Crystal Palace og Burnley, er þetta stærsti leikur Palace á þessu tímabili þar sem ef Palace vinnur leikinn munu þeir tryggja sæti sitt í úrslitakeppninni um laust sæti í úrvalsdeildinni.

Í byrjun tímabilsins gekk ekkert upp hjá Palace og í byrjun október sátu þeir í fallsæti í deildinni, þá ákvað hinn litskrúðugi eigandi Palace Simon Jordan að reka framkvæmdastjórann Peter Taylor og voru margir ósáttir við brottreksturinn þar sem Taylor var Palace-goðsögn og lék í mörg ár með Palace og var valinn leikmaður ársins 1974 og 1976. Árið 1974 lék Taylor 4 landsleiki fyrir England og skoraði í 2 mörk. Á þeim tíma lék Taylor með Palace í ensku 3ju deildinni, sem gerir þetta að ótrúlegum árangri.

Ef menn voru ósáttir við brottrekstur Taylors, þá byrjaði óánægjan fyrst þegar klikkhausinn Neil Warnock var ráðinn í staðinn. Warnock hefur náð ágætis árangri sem framkvæmdastjóri, en hann er betur þekktur fyrir miklar yfirlýsingar og óþolandi framkomu. Fljótlega fyrirgáfu stuðningsmenn Palace Jordan fyrir að reka Taylor og ráða Warnock, því liðið gjörbreyttist. Liðið spilaði síðan í 3 mánuði án þess að tapa leik og voru skyndilega komnir í toppbaráttuna. Crystal Palace hefur síðan aðeins gefið eftir í toppbaráttunni og eru núna í umspilsæti og sigur á morgun gulltryggir þeim sætið í umspilinu.

Það sem gerir þetta tímabil að spennandi tíma fyrir Palace er hinn mikli fjöldi af ungum leikmönnum sem er að koma upp. Á meðan Taylor lagði allt traust sitt á gömlu leikmennina, þá fór Warnock í unglingaliðið hjá Palace og fann hvern unglinginn af fætum öðrum til tefla fram í liðinu. Til dæmis í einum leiknum voru 5 leikmenn 17 ára eða yngri í byrjunarliðinu, sá yngsti John Bostock var aðeins 15 ára þegar hann lék sinn fyrsta leik fyrir Palace og þeir sem fylgjast aðeins með fótbolta ættu að leggja nafnið hans á minnið, hann á eftir að verða einn af þeim stóru.

Fyrir þá sem ætla að hafa samband við mig á morgun, þá verð ég utan þjónususvæðis á milli klukkan 1 og 3.


Við hvað er Ólafur ósáttur?

Ólafur F MagnússonMér finnst fréttir af þessu máli furðulegar, það kemur ekkert fram um það af hverju Ólafur er ósáttur við verðlaunatillögurnar eða veit hann kannski ekki sjálfur af hverju hann er ósáttur við hana. Mér finnst þetta dálítið barnalegt eða aumkunarvert hvernig þetta kemur fram í fréttum. Er hann ósáttur við að það sé byggt í Vatnsmýrinni eða er hann ósáttur við að byggðin eigi að vera svona þétt eða vill hann hafa hana þéttari, vill hana hafa húsin lægri eða hærri?

Mér finnst furðulegt að maður í þessu embætti getur leyft sér að segja að hann sé ósáttur við svona stórt mál, án þess að útskýra það nánar.


mbl.is Borgarstjóri gagnrýnir vinningstillöguna
Tilkynna um óviðeigandi tengingu við frétt

Kemur ekkert á óvart.

Þessar tölu koma mér ekkert á óvart. Eina ástæðan fyrir því að handbolti er enn stundaður á Íslandi af einhverri alvöru, er sú að Ísland hefur náð ágætum árangri á heimsvísu miðað við aðrar íþróttir sem eru í samkeppni við handboltann. Það er kannski ekki furða að Ísland hefur náð ágætum árangri þar sem það eru ekki mörg lönd sem handbolti er vinsæll í. Ég sá lista yfir vinsælustu íþróttir í heiminum fyrir nokkrum árum og þar komst handboltinn ekki á topp 100 listann. Á meðan voru aðrar bolta íþróttir mjög ofarlega, eins og fótbolti (sem var númer 1 á listanum), körfubolti og blak.

Ég tel að það séu tvær stórar ástæður fyrir því af hverju vinsældir handboltans hafa dvínað svona. Í fyrsta lagi er það óstjórnin hjá HSÍ. Maður veit aldrei hvernig deildarkeppnin er, það virðist vera mottó hjá þeim að breyta mótafyrirkomulaginu á hverju ári til að rugla almenna áhorfendur. Núna virðist þeim hafa tekist að finna út ágætt fyrirkomulag sem er mjög óspennandi, en ég er nokkuð viss um að því verði breytt fyrir næsta tímabil.

Á sama tíma þá hefur KKÍ komið niður á sitt mótafyrirkomulag og hefur það verið nánast óbreytt í einhver 20 ár, með smávægilegum breytingum. Sumar breytingar sem KKÍ hefur gert á sínu mótafyrirkomulagi hafa ekki gengið upp og þá hafa þeir breytt því til fyrrivegar. En þeir hafa ekki farið niður á sama plan og HSÍ og reynt að koma með nýtt mótafyrirkomulag á hverju ári.

Hin ástæðan fyrir því af hverju ég held fyrir dvínandi áhuga á handbolta, er sú að íþróttin er þannig að erfitt er að stunda hana á fámennari stöðum og erfitt er að stunda hana utan íþróttahúsa. Ég hef aldrei á minni ævi séð krakka vera að leika sér úti í handbolta, á sama tíma sér maður nánast daglega einhverja krakka vera að leika sér í körfu. Það er ekki hægt að leika sér í handbolta nema að vera 10-15 saman, á sama tíma geta 2 keppt í körfu og 3 í fótbolta. Ef að lið ætlar að halda úti unglingastarfi í handbolta, þá þurfa helst 20 manns að æfa íþróttina. Sem getur verið erfitt á fámennum stöðum, þess vegna velja minni íþróttafélögin frekar að halda úti körfubolta frekar en handbolta. Þess vegna er handboltinn orðin að Reykjavíkuríþrótt.


mbl.is Handboltinn gefur eftir
Tilkynna um óviðeigandi tengingu við frétt

« Fyrri síða

Innskráning

Ath. Vinsamlegast kveikið á Javascript til að hefja innskráningu.

Hafðu samband