Hljóðlátur eltingarleikur!

Þessi eltingarleikur hefur verið hljóðlátur þar sem að ég steinsvaf á meðan hann fór framhjá svefnherbergisglugganum mínum. Það er kannski ekki að marka mig þar sem ég get sofið ansi fast og ekki rumskað þó mikið gangi á í nágrenninu. Síðan er annað mál að ég er ansi þreyttur á öllum hraðahindrununum sem búið er að setja upp í Keflavík, en núna sýna þær að þær eru til margra hluta nytsamleg. Ég ætti kannski að fara fram á að fá þriðju hraðahindrunina í götuna mína.

Talandi um eltingarleiki, þá varð ég einu sinni vitni að svona eltingarleik í Bandaríkjunum þegar ég bjó þar. Þó að margir halda því fram að svona eltingaleikir séu daglegir atburðir í hverri borg í Ameríkunni, þá hafa þeir horft á of marga þætti af "Most Socking Vdeos" eða hvað sem þættirnir heita. En þar sem ég bjó í fínu hverfi þá varð ég bara vitni að einum eltingarleik. Það var ökuníðingur sem keyrði framhjá húsinu okkar og beygði inn á bílaplanið okkar en þar hafði einum lögreglumanninum dottið í hug að beygja áður en kom að húsinu og fara hinum megin inn á bílastæðið og kom þá á móti ökuníðingnum. Þrátt fyrir að vera búin að loka hann af þá keyrði lögreglumaðurinn á bíl ökuníðingsins. Þessi eltingarleikur var ansi hávær, enda eitthvað um 10 lögreglubílar með sírenur á fyrir utan svalirnar hjá mér. Mér fannst eins og ég væri kominn í svona "Most Shocking Videos" sjónvarpsþátt. En við ákváðum að segja engum frá þessum eltingarleik á meðan við vorum í Ameríkunni, það voru alltof margir þegar með of miklar áhyggjur af okkur.

Lögregla veitti ökumanni sem er grunaður um ölvun eftirför

Ég vil Eyjólf burt .... strax í kvöld.

Liechtenstein vann í kvöld verðskuldaðann sigur á Íslandi 3-0, þetta var ekki bara sigur heldur burst gegn einu lélegasta landsliði Evrópu. Ég get ekki skilið hvernig Eyjólfur velur og stillir upp landsliðinu, það er sennilega vegna þess að ég hef meira vit á fótbolta en hann. Ég er svo reiður að ég er ekki í formi til að skrifa gagnrýni mína.

Ég hef reyndar grun um að það skiptir litlu máli hvort Eyjólfur hættir, KSÍ klíkan ræður bara einhvern af skrifstofunni eins og þeir hafa gert í síðustu tvö skipti sem landsliðsþjálfari er ráðinn og voru þeir báðir mjög reynslulitlir svo vægt sé til orða komist þegar þeir voru ráðnir. Ég held að Eyjólfur hættir á morgun og Jóhann G. Kristinsson vallarstjóri á Laugardalsvelli verði ráðinn í staðinn. Síðan verður Sigríður Sigurðardóttir ræstitæknir á skrifstofu KSÍ ráðinn sem aðstoðarmaður Jóhanns.

Ljótur skellur Íslands í Liechtenstein

Ætli þeir séu skyldir Bjarna Guðjóns?

Það getur ekki verið annað en þessir nemendur séu skyldir þeim feðgum Bjarna og Guðjóni. Ég vona að þessum nemendum verði refsað af skólayfirvöldum fyrir uppátækið.

Laxerolía í samlokum í Brekkubæjarskóla á Akranesi

Ætli hún sé ljóshærð?

Þetta minnir mig á eina sögu þar sem fyrrverandi vinnufélagi minn var að skemmta sér langt fram eftir nóttu og þegar kominn var tími til að fara heim þá fór hann út í bíl og ætlaði að keyra heim þrátt fyrir að vera vel við skál. Eins og svo algengt er með drukkna ökumenn þá komst þessi ekki langt, hann keyrði inn í húsgarð nokkrum tugum metrum frá þeim stað sem ferðin byrjaði. Þar sem garðurinn var töluvert lægri en vegurinn var ekki auðvelt fyrir hann að koma bílnum út úr garðinum, enda er það ekki hægt nema með krana. Þá uppgötvaði hann sér til mikillar gleði að lögreglustöðin væri ekki nema í um 200 metra fjarlægð frá slysstaðnum og hann fór á lögreglustöðina til að biðja þá um aðstoð um að koma bílnum úr garðinum. Lögreglan tók bílinn úr garðinum, en maðurinn var færður í blóðsýnatöku og síðan fékk hann að sofa á lögreglustöðinni og þurfti síðan að taka út sína refsingu.

Ég gaf í skyn að ölvaði ökumaðurinn við Selfoss í nótt hafi verið ljóska, en ég veit ekkert um það. En gamli vinnufélagi minn er dökkhærður karlmaður af færeyskum ættum.

Ölvaður ökumaður bað um aðstoð lögreglu

Gaman að fá svona hlutlausa frétt.

Það er líklegt að þessi frétt sé bein þýðing frá áróðursmeistara tyrknesku ríkisstjórnarinnar og líklegt að tímasetningin sé ekki tilviljun. Tyrkirnir eru búnir að vera að deila við Bandaríkjamenn vegna þess að Tyrkir vilja ekki viðurkenna að þjóðarmorðin sem þeir frömdu á Armenum snemma á síðustu öld séu þjóðarmorð. Þeir eru búnir að kalla sendiherrann sinn heim frá Washington til að sýna hversu alvarlega þeir telja samþykkt Bandarríkjaþings vera þegar þeir skilgreindu þjóðarmorðin sem þjóðarmorð.

Núna er tyrkneska áróðursvélin komin í gang og má búast við að þeir fremji þjóðarmorð í Norður-Írak á næstu mánuðum, þar sem Bandaríkjamenn þora ekki að styggja Tyrkina frekar vegna hagsmuna sinna.

Spennan eykst við landamæri Tyrklands og Norður-Íraks

Veita þeim hæli strax.

Auðvitað á að veita þeim hæli strax. Þeir hafa greinilegan mikinn vilja til að verða nýtir og góðir þjóðfélagsþegnar.

Brotist inn í bæjarskrifstofur í Reykjanesbæ

Verður þá aftur hægt að kaupa kaldan bjór í Austurstræti?

Þetta eru stórar fréttir og koma manni verulega á óvart, þó samt ekki. Ljóst er að stjórnendur Sjálfstæðisflokksins í Reykjavík hafa stórskaðað flokkinn með mörgum umdeildum málum. Núna síðast með máli REI og Orkuveitu Reykjavíkur, áður voru mál eins og bjórkælirinn, spilakassamálið og að sjálfsögðu hin svokallaða klámráðstefna, sem var engin ráðstefna. Ljóst er að Vilhjálmur á ekki marga vini í Sjálfstæðisflokknum þar sem hann virðist hafa klúðrað stjórnarmeirihlutanum upp á sitt einsdæmi.

Síðan er spurning hvað verður um Björn Inga, eða Gomer Pyle eins og honum er stundum líkt við. Er hann að fara yfir um eins og Gomer Pyle gerði í Full Metal Jacket sem endaði síðan með því að hann drap yfirmann sinn og framdi síðan sjálfsmorð. Björn Ingi framdi í dag pólitískt morð á yfirmanni sínum Vilhjálmi borgarstjóra og núna er spurningin hvort þetta sé líka pólitískt sjálfsmorð hjá Birni.

Nýr meirihluti myndaður í borgarstjórn

Auðvitað fordæma Tyrkir atkvæðagreiðsluna.

Að sjálfsögðu fordæma Tyrkir atkvæðageiðsluna. Hverjir vilja vera sakaðir um þjóðarmorð þó þeir beri ábyrgð á þeim?

Tyrkir drápu 1,5 milljón Armena þegar þeir fluttu þá nauðungaflutningum frá heimkynnum sínum sem var í austurhluta landsins. Þar að auki þá drápust þúsundir Armena þegar þeir voru reknir út á eyðimörkina í átt að Írak, en þangað vildu Tyrkirnir að Armenarnir færu. Það eru flestir sagnfræðingar og stjórnmálafræðingar sammála um að þetta hafi verið grimmdarleg morð og mjög vel skipulögð. Það þurfti mikinn mannskap til verksins og þau tóku langan tíma. Ef þetta er ekki þjóðarmorð þá er þjóðarmorð ekki til.

Tyrkir fordæma atkvæðagreiðslu um þjóðarmorð í Bandaríkjunum

Besta tónlistarmyndbandið kemur frá Finnlandi.

Bohemian Rhapsody er frábært lag og myndbandið gott. En besta myndband sögunnar er að mínu mati er myndbandið við lagið Love Me Tender með finnska dúettinu Sawyer og Kate. Hægt er að horfa á myndbandið hér og góða skemmtun.

„Bohemian Rhapsody“ valið besta tónlistarmyndbandið

Er ég kona?

Í fréttatímanum á Ríkissjónvarpinu í kvöld var frétt af einhverjum skotglöðum austfirðingum sem fóru til Namibíu til að drepa falleg dýr. Á þessum 8 daga veiðitúr náðu þeir að murka lífið úr 15 dýrum, þar á meðal sebrahesti, hlébarða og einhverju dádýri. Veiðimaðurinn sagði sigri hrósandi að það væri munurinn á karlmönnum og kvenmönnum að karlmenn geta og vilja skjóta svona dýr. Eftir þessa staðhæfingu verð ég sennilega að játa að ég er kvenmaður, þar sem ég hef engan vilja til að drepa dýr. Til dæmis þá gæti ég aldrei verið bóndi og mér finnst ágætt að trúa því að kjötið verði til í kjötbúðum. Samt ber ég mikla virðingu fyrir bóndanum, þó ég gæti aldrei verið bóndi.

Aftur að fréttinni. Ég get ekki skilið hvað var svona merkilegt við hana til að ástæða var að birta hana í sjónvarpinu. Ekki finnst mér það merkilegt að fara til Afríku að drepa dýr sér til gamans. Það er alla vega ekki jákvæð frétt.