Á ekki að lækka allan hámarkshraða niður í 30?

Ég er algjörlega á móti því að hámarkshraðinn verði lækkaður niður í 30 á Vesturgötunni, nema að það sé vilji að lækka allan hámarkshraða innanbæjar niður í 30. Það er mín skoðun að það séu ekki þeir sem keyra á löglegum hraða sem verða valdir að slysunum, heldur þeir sem keyra ógætilega og of hratt og þeir fari ekki að keyra á löglegum hraða ef hámarkshraðinn verður lækkaður. Vesturgatan er nokkuð breið og opin gata og ef hún ber ekki 50 km hraða þá gerir engin gata það. Ef það sé vilji íbúa að koma í veg fyrir ofsaakstur þá á að setja upp þrengingar og hraðahindranir, ekki að lækka hámarkshraðann.

Ekki segja að ég þekki ekki til þarna þar sem ég bý í næstu götu við þar sem slysið í gær varð og börnin mín þurfa að fara yfir Vesturgötuna þegar þau fara í skólann.

Íbúar mótmæla

Athugasemdir

[Friðrik Friðriksson, 2.12.2007 kl. 02:34]

Sammála þér í þessu,það þarf þrengingar á þessa götu og það er auðveld aðgerð því gatan er það breið.

[Sigurður M Grétarsson, 2.12.2007 kl. 09:29]

Það er mín skoðun að allar götur, sem börn þurfa að ganga yfir á leið í og úr skóla þurfi að vera með einhvers konar hraðahindrun þar með talið þrengingum. Best væri ef hægt væri að hafa þær allar 30 km. götur en mér skilst að það séu takmörk fyrir því hversu lengi í einu hægt er að halda ökumönnum við 30 km. hraða. Því þurfa ákveðnar gegnumstreymisgötur að vera með 50 km. hraða. Á þeim götum er þá nauðsynlegt að vera með þrengingar við helstu gönguleiðir yfir götuna.

Best væri þó ef hægt væri að gera allar íbúðargötur að 30 km. götum og halda ökumönnum á þeim hraða hvort, sem það væri gert með hraðamyndavélum eða hraðatakmörkurum í bílum, sem skynjuðu frá ákveðnum sendum þegar bíllin væri í íbúðartötu og hleypi ökumanni einfaldlega ekki upp fyrir 30 km. hraða inni í þeim. Slíkt myndi koma í veg fyrir mörg slys og þar með talið banaslys.

[Mummi Guð, 2.12.2007 kl. 10:53]

Ég er hrifinn af hraðahindrunum þar sem gangbrautir eru hækkaðar upp. Þá verða ökumenn að hægja á sér og á þeim stað þar sem börn og fullorðnir eiga að fara yfir. Slíkar hraðahindranir eru á nokkrum stöðum í Keflavík og virka vel svo ég best veit. Ég held að það væri besta lausnin að fjölga slíkum hraðahindrunum.