Íslandsmótið búið.

Þá er Íslandsmótinu í fótbolta lokið og lauk því með smá fjöri, þar sem Valsmenn nánast stálu titlinum af FH-ingum á lokasprettinum. Er ég töluvert sáttur við það enda ekki gaman þegar sama liðið verður meistari ár eftir ár, þetta var farið að líkjast norsku knattspyrnunni þar sem Rosenborg unnu alltaf og það var farið að segja frá því í Noregi að það eina sem gæti komið í veg fyrir að Rosenborg verði meistari er að þeir myndu ráða Teit Þórðarson sem þjálfara. Eftir að hafa fylgst með sumrinu þá gerir maður sér grein fyrir því að hinn lélegi árangur KR í fyrra var engin tilviljun.

Fallbaráttan var æsispennandi og kom það í hlut Víkinga að falla og kemur mér það ekkert á óvart, þeir voru með langslakasta liðið í sumar, þeir hefðu kannski geta náð að bjarga sér ef þeir hefðu haft betri þjálfara. Fyrirfram voru HK menn líklegastir til að falla en þeir komu á óvart í sumar og sigldu lygnan sjó þó að þeir hafi aldrei náð að losna alveg við fallbaráttuna. Hvorki KR né Fram hefðu aldrei átt að vera í fallbaráttunni og ég held að eina ástæða þess að þeir voru þar séu slakir þjálfarar og það er gaman að segja frá því að þjálfararnir voru bræðurnir Teitur og Ólafur Þórðarsynir.

Valsmenn urðu Íslandsmeistarar eftir að hafa fylgt FH-ingum allt sumarið og ég hreinlega hélt að FH yrðu Íslandsmeistarar þar til í síðustu umferðinni þar sem FH tapaði fyrir Val og skyndilega voru Valsmenn orðnir efstir.

Sumarið var erfitt fyrir mig sem stuðningsmann Keflavíkur. Við byrjuðum frábærlega, sýndu sannkallaðann sambabolta og það var gaman að fara á leiki og sjá liðið sitt spila frábærlega. Í byrjun júlí spiluðum við ÍA og þar sýndu þeir Skagamenn fáheyrðan óheiðarleika og ódrengskap sem flestir myndu skammast sín fyrir og unnu leikinn á mjög óíþróttamannslegan hátt. Það virðist sem mínir menn hafi brotnað niður við þetta, enda á heiðarlegt fólk oft erfitt með að lifa með óheiðarleika annarra og liðið var ekki svipur hjá sjón eftir þetta og liðið seig lægra og lægra í deildinni og endaði tímabilið í 6. sæti.

Það eru nokkrir áhugaverðir félagsskiptapunktar sem vert er að hugsa um eftir að Íslandsmótinu er lokið. Helgi Sigurðsson fór frá Fram til Vals til að vinna Íslandsmeistaratitil og varð hann að ósk sinni. Jóhann Þórhallsson falldraugur Íslands (Hermann Hreiðarsson er ekki meðtalinn) hefur fallið með Þór, KA og Grindavík og eftir að hann féll með Grindavík í fyrra þá fékk hann tilboð frá mörgum félögum, en hann valdi að fara til KR og af hverju? Hann vildi vinna titla. Jóhann sem hefur fallið með öllum félögum sem hann hefur spilað með nema KR náði næstum því að senda KR niður líka í sumar. Þá er líka umhugsunarvert af hverju Matthías Guðmundsson yfirgaf Val til að spila með FH, var það ekki til að vinna titla. Ef svo er þá vona ég að hann geri sér grein fyrir að grasið er ekki alltaf grænna hinum megin.

Síðan má hugsa um þá leikmenn sem FH hefur ekki haft not af og losað sig við. Þar skal fyrstan nefna Jónas Grana Garðarson sem hafið farið á kostum í sumar og tryggði sér gullskóinn fyrir að vera markahæsti leikmaður Íslandsmótsins, þetta var leikmaður sem FH gat ekki notað eins og Baldur Bett sem hefur farið á kostum með Val og Atli Viðar Björnsson sem hefur leikið við hvern sinn fingur með Fjölni. Á sama tíma hefur FH safnað að sér gömlum leikmönnum sem hafa ekki náð að sína neitt fyrir FH, leikmenn eins og Sigurvin og tvíburabræðurnir Arnar og Bjarki.

Athugasemdir

[Njáll (IP-tala skráð) 30.9.2007 kl. 23:11]

Flottur pistill hjá þér Mummi.  Maður verður bara að vona að Keflvíkingar safni kröftum í vetur og komi sterkir til leiks næsta vor.    Bið að heilsa

[Mummi Guð, 30.9.2007 kl. 23:23]

Við verðum að safna kröftum í vetur ef við ætlum að sýna eitthvað næsta sumar. Það verða miklar breytingar á milli ára, við missum Baldur og Brankó og líklega Mete, Símun og Marko. Þannig að það verður verðugt verkefni að safna í lið. Víkingar féllu og það eru ekki margir leikmenn sem hægt er að fá frá þeim, enda ekki að ástæðulausu að þeir féllu!