Jón eða séra Jón.

Það er greinilega ekki sama hvað Jón eða séra Jón segja þegar það á að dæma þjálfara í leikbönn. Þá er ég að vitna til þess þegar Kristján þjálfari Keflavíkur og Leifur þjálfari Fylkis fengu mun þyngri refsingu í fyrra fyrir töluvert vægari ummæli. En kannski er þetta breyting á refsingum hjá KSÍ, ég veit það ekki.

Það er annað sem vekur athygli mína yfir úrskurði aganefndar KSÍ í gær. Þjálfari 3. flokks drengjaliðs Vals er þar dæmdur í eins leiks bann fyrir brottvísun. Ég hefði haldið að knattspyrnufélög legðu metnað sinn í að hafa góða þjálfara sem er jafnframt góð fyrirmynd fyrir unglingana sem þeir eru að þjálfa. Þrátt fyrir að vera að þjálfa 14-16 ára börn þá er þessi þjálfari búinn að fá tvær brottvísanir í sumar og fjórar áminningar. Til útskýringa þá getur þjálfari ekki fengið spjöld fyrir brot eða handleika boltann, heldur býst ég við að allar þessar refsingar hafa komið vegna kjaftbrúks. Þessi maður á langa sögu að baki sem þjálfari og virðist það vera viðtekin venja hjá honum að fá áminningar og brottvísanir fyrir að munnhöggvast við dómarann miðað við gagnagrunn KSÍ.

Guðjón og Magnús ávítaðir og sektaðir af KSÍ

Athugasemdir

[Margrét Össurardóttir (IP-tala skráð) 5.9.2007 kl. 18:06]

Ég spurði sjálfan mig þegar ég las þessa frétt hvort 10 þús. kr. í sekt væri ekki bara brandari?

[Mummi Guð, 5.9.2007 kl. 18:12]

Þú veist hvað það er lítill peningur í fótboltanum. Tíu þúsund krónur ganga væntanlega frá fjárhagnum hjá þessum liðum.

[Rannveig Lena Gísladóttir, 7.9.2007 kl. 19:15]

Hef svo sem ekki hundsvit á fótbolta... veit bara það að mjög víða er það ekki sama hvort um er að ræða Jón eða Séra Jón!