Ísland náði jafntefli gegn arfaslöku liði Kanada.

Ísland náði aðeins jafntefli gegn arfaslöku liði Kanada. Leikurinn var frekar leiðinlegur á að horfa og ég veit ekki alveg hvað Eyjólfur er að hugsa í sambandi við þetta lið. Mér finnst eins og hann viti ekki hvað hann vill gera og hvernig hann ætlar að nýta sér þennan æfingaleik til að ná í stig í undankeppni EM.

Í dag var birtur styrkleikalisti FIFA og enn einu sinni falla Íslendingar á listanum og eru núna komnir í 117 sæti og deila því sæti með ekki ómerkilegra landi en Súdan. Næstu lönd fyrir ofan Ísland eru síðan Malta, Kazakstan, Namibía, Burundi, Sýrland og Malawi. Þetta eru allt lönd sem við viljum ekki bera okkur við hvorki í íþróttum né öðrum hlutum. Þeir félagar Eyjólfur og Geir eru búnir að vera duglegir í dag að gera lítið úr þessum lista. Eyjólfur sagði til dæmis í fréttum í dag að sumir kölluðu listann Coca-Cola-listann svo lítið álit hafa menn á honum. Ég get sagt Eyjólfi að listinn heitir á ensku, FIFA/Coca-Cola World Ranking. Coca-Cola er einn stærsti styrktaraðili FIFA og fá meðal annars nafn sitt á þennan lista. Listinn er ekki kallaður Coca-Cola listinn vegna þess hversu ómarktækur hann er, heldur vegna þess að Coke kostar hann.

Geir Þorsteins er búinn að vera lítið skárri, segir að listinn sé ekki marktækur vegna þess að við erum í Evrópu og erum að spila við miklu sterkari lið en önnur lið á listanum. Þessi ummæli eru furðuleg að það er varla hægt að svara þeim.

Niðurstaðan, Ísland náði jafntefli gegn slöku liði í slökum leik og Eyjólfur er sáttur við leikinn.

Ísland og Kanada gerðu jafntefli, 1:1

Athugasemdir

[Kiddi Blö, 22.8.2007 kl. 20:51]

Þú mátt ekki tala illa um Eyjólf litla... sumir gætu orðið sárir.  Eins og td þegar þessi fáni var notaður :)

http://www.fotbolti.net/fullStory.php?id=48460

[Þórður Steinn Guðmunds, 22.8.2007 kl. 20:55]

Þetta var hræðilegur leikur og ef það væri einhver metnaður hjá fjölmiðlamönnum í kringum þetta landslið ættu þeir að jarða Eyjólf núna. Arfaslakt lið Kanada og við vissum ekkert hvað við áttum að gera.

[Mummi Guð, 22.8.2007 kl. 21:12]

Það sem mér finnst verst er það að ég held að Eyjólfur hafi ekki hugmynd um hvað hann er að gera með landsliðið. Það er enginn uppbygging eða lína sem hann virðist vera að fara eftir. Mér finnst eins og hann velji 11 leikmenn og þegar hann er búinn að því þá velur hann stöður fyrir þá og segir þeim að fara inn á og spila fótbolta.

[Skarfurinn, 22.8.2007 kl. 21:25]

Ísland hefur nú gert jafntefli á heimavelli gegn bæði kanada og Lichtenstein og tapað 5-0 gegn Svíþjóð. liðið getur örugglega ekki sokkið neðar í aumingjaskap, ef KSÍ hefur einhvern smá snefil af metnaði á að segja Eyjólfi upp á stundinni, maðurinn er arfaslakur sem þjálfari þó hann hafi verið góður leikmaður á sínum tíma. Nú verður Geir formaður að standa upp og sína að hann sé verðugur eftirmaður Eggerts.